مكتبة محمد الحسن سالم حميد
   



عودة للخلف   منتديات سودانية | اخبار سودانية | حلتنا السودانية > البيت العام > هذيان > ادبيات
اسم العضو
كلمة المرور

الملاحظات

ادبيات قسم مخصص للادب المنقول


ادبيات

قسم مخصص للادب المنقول



 
رد
المنتدى المشاركات الجديدة ردود اليوم ادريس جماع ـ قصيدة ولى المساء lمكتبة سيف الدين محمد الامينالمشاركة التالية
نسخ الرابط
نسخ للمنتديات
 
LinkBack أدوات الموضوع أنماط عرض الموضوع
قديم 2011-07-13, 11:17 AM   #51 (permalink)
ابو مياس


الصورة الرمزية ابو قزح
ابو قزح غير موجود حالياً

بيانات اضافيه [ + ]
 رقم العضوية : 24
 تاريخ إنضمام العضو :  May 2011
 أخر زيارة : 2011-10-24 (11:51 AM)
 المشاركات : 570 [ + ]
 التقييم :  50
 الدولهـ
Sudan
 الجنس ~
Male
 MMS ~
MMS ~
 SMS ~
سمحه وسمريه
محبوبتي
ولفتاتا غزاله
لوني المفضل : Darkmagenta
إفتراضي رد: مكتبة محمد الحسن سالم حميد



الشاعر محمد الحسن سالم حميد
آخر الريد


جاييك من آخر الريد مشياً
على الأشواق
عز الليالى البيد آنست
نورك باق
خبيت مشاعرى شديد
الدروخة الساساق
كلما لك انت بعيد
توميلي بالاطواق
بى آيه تفتحى الأبواب
للجاك عديل ودنا
داير عينيك قراب وتبقيلي
دار ودنا
لو بالمحبة حباب إبن الملوح أنا
لو بالنغم زرياب وما خلى
فيك غنا
لو بالعلم دا كتاب مفتوح لك
ألف سنة
لو بالضرب دي حراب عنتر
مدارقو هنا
لو بالرسم جذاب عند أمو كل جنا
لو مو الشمس كضاب البدر
يضوي سناء
لو بالقرش وين جاب ما جاب
براهو هنا
لله كم خطاب تتمنى حالو مني
يا بت بلا استغراب تكشحلى
جور وضنا
وأنا اجدر الخُطاب واكتر قلوبه عنا
راجيك تقولى حباب يا ......
ريدتى هاك كفنه
فالدنيا دون أحباب غيمة
الضباب دفنه


 


رد مع اقتباس
قديم 2011-07-13, 11:18 AM   #52 (permalink)
ابو مياس


الصورة الرمزية ابو قزح
ابو قزح غير موجود حالياً

بيانات اضافيه [ + ]
 رقم العضوية : 24
 تاريخ إنضمام العضو :  May 2011
 أخر زيارة : 2011-10-24 (11:51 AM)
 المشاركات : 570 [ + ]
 التقييم :  50
 الدولهـ
Sudan
 الجنس ~
Male
 MMS ~
MMS ~
 SMS ~
سمحه وسمريه
محبوبتي
ولفتاتا غزاله
لوني المفضل : Darkmagenta
إفتراضي رد: مكتبة محمد الحسن سالم حميد



الشوق من حاصف ..
لا قاصف
يتلم .. يهز ليك يا نورة
يا درقة وسيف
يا حضناً كيف
من شر الصيف
والشتاء ضاراي .. ضاراي
يا شتلة عز بقت جواي
عدت بي ضلام بحراً عاصف
يا نور قاعد بك .. قايم بك
شايلك مورودة ومتوكل
يا نورا علينا .. علي الله
والفرج القرب .. وحايم بك
يا بت العرب النوبية
يا بت النوبة العربية
يا فردة نخوة بجاوية
أو شدر الصحوة الزنجية
دسيني من الزمن الفارغ ..
من روح المتعة الوكتية
من شر الساحق والماحق ..
بين دبش المدن المدعية
والليل اتحكر بيناته
وكحل بي دبشو عويناته
يا شمس الناس المسقية
روحّت أتنسم أخبارك ..
لا تشفق ..
قالوا لي نصيحي !!!
وأنا عارفك ممكونة وصابرة ..
لكن لي ناس إلا تصيحي
جواي مأساتك مغروسة ..
يا طفلة تفتش في باكر
ما بينات نخلة وأبنوسة
الجوع العطش الفد واحد ..
الفقر الضارب زي سوسة
الخوف والحالة المنحوسة
يا بحر الحاصل ..
لاك ناشف ..
لا قلمي الفي ايدي عصا موسى
يا أم غلباً حار ينبر فينا ..
ما عدا صباح من ها .. الميناء
كد الكداح شايلا سفينة
الناس عوجات .. تحرس .. ترجا
ترجعبو سلاح وأنوار زينة
بمبان ..
شوفونير ..
آفات ..
وسكي ..
للناس الدمنا بنزين
فِقراً تسترق من دينا
بايركس أبريقن ..
والموية ..
تتحدي بيض الوزينة !!!
خرزات السبحة أمريكية ..
خصل الموكيت إيطالية
دفتر شيكاتاً ربوية ..
في الجيب
والسيرة النبوية
جمب مصحف جوه البترينة
تقروقتك .. ديمة علي القبلة ..
ميهيجة إبريقك بي طينا
السبحة أصابعك يا صالحة ..
يا بت الناس الصالحين
الذمم المشرية الطالحة …
شتان بين دينك وبين دينا
شتان بين أحمد
وحاج أحمد ..
وقداس ناس ياي وسلاطينا
شناك مع الخلق النايحة
علي أرض فلسطين الفاتحة
البركة في لونك يا سيناء
يا نورا
شليلك ما فات
بي بعدلو شليلك جاييكي ..
ما جايي ألم التمرات
لا أبكي وأقابل بالفاتحة
في زولاً ليّ مرض .. مات
جاييك أتزود من غلبك ..
وأكفر خطأ غيمة ما جات
نبحث لها كل المعمورة
والناس يوم تمرق مدخورة
يا نورا نسيلك غنوات
وأمالي بي باكر مضفورة ..
طلابك وأقلامنا هويتك ..
قدامنا قضيتك سبورة
رتبنا الخرطة البتوصل
أدينا الخاطر يا نورا
بالمد الثوري المدافع ..
فوق دربك تب ما متراجع
رغماً عن عنت الأيام ..
والزمن الجهجاه الفاجع
ما رمل الدرب الوسطاني ..
وكتيني الراحل وصاني
لا ترجع ساكت يا شافع
لا ترجع شافع يا ساكت
خد بالك وعينك في الشارع
لا ترجع .. لا .. لا
الشارع فاتح في الشارع
الشارع صان ..
صان الشارع
جاييك كايسلك يا نورا..
لا كت ليها أغني معاناتا
الفجر الكاذب يرشحني
ترشع بي الواطة سماواتا
شدرات السافل تنتحنى
بى الحاصل أعبئ مساماتا
الناس القصر تنصحنى
اتكاجر أتور نجماتا
القمر الطيب يفضحنى
تنبحنى سجونك وآهاتا
كجنا سجونك لولاك
كم عشقا يتيرب واطاتا
منعول الزمن الخلاكا
سلمت الوطن الهمبانة
على كيفك سيفك يتحكم
يا سوسة تكنك ما بتعلم
بي شتلة تقرِّب تتكلم
يا حال البتألم وساكت
ويا حال الساكت وبتألم
يتفتق جرحك يوم نبرا
ونتملي .. وقيدك ينحطم
وين عاتب هارب من بكرة
وخطو التاريخ البتقدم
للزمن الإنسان السدرة
حيوقف قولو ما بيرغم
المنفي في شرعو كما الهجرة
والسجن متل دار الأرقم
والشارع قارن في الشارع
رغماً عن عنت الأيام
والزمن الجهجاه الفاجع
بالنفس النازل والطالع
وأنا واحد من شعب مضارع
سميت ومشيت ما متراجع
غنيتك يا عشقي وتيهي
يا بلاداً كم سمحة وجيهي
لو لقت الناس البتدورا
الأيدي التنفض كانديكا
تنقفذ تلحقا في الكانديكا
ترتالا
تكوس لها في الجيهي


 


رد مع اقتباس
قديم 2011-07-13, 11:22 AM   #53 (permalink)
ابو مياس


الصورة الرمزية ابو قزح
ابو قزح غير موجود حالياً

بيانات اضافيه [ + ]
 رقم العضوية : 24
 تاريخ إنضمام العضو :  May 2011
 أخر زيارة : 2011-10-24 (11:51 AM)
 المشاركات : 570 [ + ]
 التقييم :  50
 الدولهـ
Sudan
 الجنس ~
Male
 MMS ~
MMS ~
 SMS ~
سمحه وسمريه
محبوبتي
ولفتاتا غزاله
لوني المفضل : Darkmagenta
إفتراضي رد: مكتبة محمد الحسن سالم حميد



الرجعة للبيت القديم
.......
أنا ماشي ... راجِع ...
لي بِيُوت تفتح لِي.. أدُقْ أو ما أدق
من غير تقول ..الزول مِنُو
ولا حتَّى ..علّ الداعي خِير
لا مالَك ..الجابك شِنُو
لي بيوت بجِيهن
في أيِّ يوم
إن جيتا ليل إن جيت دغُشْ
طوَّالي ..أدفْر الباب
وأخُشْ
مرَّات أضِيق قاصر الطريق
من بيت لبيت
وفي بيتنا كُرْبُشْ
زي نسِيمة معدي شِيمة
لا أُوش لا كُش
خابراني
كلُّوب الفريق
زولاً رفيق الليل
وونّاس الدُغش
لاقطعت نوم
النائمين
لا الباري للحيشان
تقُش عند شُوفتي
تجري على هِدم
في محلها
الشوق يترسم
تنجَهْني
حتَّان بالاسم
تندَهْني
عُقْبان تبتسم
بسمة بنيَّات ناس غُبش
*** *** ***
هادي المخالِيق مؤمِنا
بسماحة الدنيا
الِهِنِا كم تأمنك
يوم تأمَنا
ولا فرقِ بين الضيف
وأنا
غير كم كليمِة ملوَّنة
بالإلفة ..
هلِّيج ..
اعتناء ..
هادي البيوت مطمِّنا
ودايماً قريبِِة من البعيد
ذي مو غريبِِة على الدَنا
ماها المريبِِة
وماب تكيد
مفتوحه طيبِة و محاننة
زولاً يجيها في كل فجر
ولاَّ إن يتم كمين سنة
تتلقَّى ذي أم الجَنا
وترشع سحابات المُنى
بالصحة .. بالعز .. بالهناء ..
ينجيك من أولاد الحرام
يحفظ يغطِّيك ربنا
هادي البيوت
ماب تتلخِم في الحكوة
ماب تنضُم كُتر
لاها البتنصنع نضِم
شايلِة الفصاحة من الطيور
اليُوت تغنِّي على التُمر
ونور المهابة من النجم
مطعُوم سكاتها من الصبُر
بينا وحروف الأمنيات
الطيبة وألف صلة رحِم
على رغم آفات الزمن
الصُرْمَة ..
حافات الفقُر
وحش المقادير النهِم
سيل المباهاة المدْلَهِم
نبَرُو المواعيظ الجهِم
من ناس كُتر
عن قصة النار
والقبر
في وضع أضيق من جُحُر
والناس لو خارجين
لو كُفر
هادي السمر
ست الضراعات الُخدر
عارفاهو من وين
جا الفقُر والحال سِجِم
يا حكمتا الزي كلمتا
المن خدمتا
واطاته واحدي وفد هِدِم
أية غفير فوق الحفِير
حقّاني قلبو على الخدِير
حيكومتا ماها البتتكلف
سُتر
مستورة خِلْقَِة
ودا المهِمْ
مفتوحه لي كل البشر
كل الخلوق من طينَها بَسْ
كل البسيماتن تبق
لو وش زماناتن
عبس مفتوحه قلباً
كلُّه خير شايل حمالتو بلا جُرَس
مفتوحة كالفضا للطيور
وبيُّوضَة للصيد والتَبَسْ
لا طبلة لا كيلون سويتش
ولا ترابيس لا جَرس
لا سِلكِ شائك لا ترَس
لا غفير تفاوضو
ولا حرس
لا كلاب تشمَّك شم جُراب
فتِّيش وجَس ..لا آه لا سِب
... ... ...
وناس سِتِّ نُور
كتلو الكلب
كتلوهو مجبورين غصِب
ما من نياحتو ولا سَعَر
ظنو الكلب بين الفريق
حامي البِطَيْنِين اللعِب
آخر الليالي من البيوت
قافل الطريق سادَّ الدرب
لأخواتها
قالت ست نور
مادام في أمان
والناس بخير
سَعَي الكلاب
في الحلِة شر
هوهيوُا بعْزاق للأجُر
أحسن تعيش
بي راحتها
تمشي الجنائن يا البحر
إن كان تطفِّش للصُبار
وأب عفنِة تشغل للورَرْ
الحلة يكفيها
الولاد
يكفي البهيمات الجَداد
يكفي الطيور الفي الشدر
الحله يكفيها البشر
كان جاها شر
الحله يكفيها
الحصانة الفيها
مادارت كَجَر
حرس الزرائب ؟
شن فِضِل
فِطْن الزرائب
غير بعر
صنَّت شويتين
ست نور
شالت حجر وجدعت حجر
جدعت حجر وشالت حجر
وقالت -
قرايبها ذات ليل
يمكن يجوها
من السفر أو زول غريب
حاربو الدليل عابر سبيل
زنقُو المطر يقصد رواكيبهم
جَوّر
أول شي
يتلقىّ الكلب
اللاب يرحِّب
لاب يبِش
وليشن يتورنا
الكلب وليش الكلب
يبقالنا وش
؟؟ ؟؟
وكان الكلب لازم يموت
الطفشوه حرن
يطش وكان الكلب
لازم يموت
شـان المحنه الفي القلب
تحيا وخيوط زمن الوصال
لا تنسلب لا تنقلب
ومات الكلب
... ... ...
وين يابيوت
عز البرود
ضمتنا كونية دِفِي
ومن لدغة الصيف
الغريب قامت حواية
همبريب
وتحت القمر
حيشانا قيزان السمر
تدِّينا لمَّن نكتفي
يا بيوت من الخاطر
قُراب ورهاب
رهابات تختفي
الإعتذارات ماب تفي
وجيت مالقيتكم
ماها في
أبوابنا
مو صاجات حديد
يغسل درابزينا الرزاز ؟!
حيطانا مو أسمنتِ
وحجر ؟!؟
شباكنا
لا سيخ لا قزاز
؟!؟
يا ضو جماعاتاً عُزاز
زي ماك بشر مامنو شر
لِز الخشم باب
ما اندفر فوق الدُقُل
قُصَّ الكشر
يا شيل حِطيبة من الأرض
.ما أبوابنا
من شدر الحَراز
والحيطة أقصر
من وَصَا
قالوها
عند ساعة السفر
وكان القطر قام
صوتو راز
البيت دا بيتك يا حبيب
أدخًل مخيَّر
وماك غريب
اتمدا في أقرب
عنْقِريب مبهول في حوضو
الهمبْريب
النيمة يا العنابة ضُل
أغشى التُكُل
خرْمان في شاي
جيعان أُكل
وداك التمُر
والزِير قريب
بايت من البارح ملآن
راقد في صدر الهمبريب
دُر تقرا ديك كتب الولاد
قلَّقت
أو طال الرِجِي
كُورِكْ
نقولَّك … هُويْ ..
بُعـــــــــــــــــاد
رسِّل لنا المرسال
نجي
بإحساس المحب
سيد بيت
وعننا ما ضِهِبْ
الهِيلنا .. هِيلَك
شِن ندس ماطال
عُمرا ًيتحسِبْ
في ياتو بنكِ
وياتو عِـبْ ؟
وياتو خزنة ؟
غير خِزَن النفوس الماهلِة
مفتاحها القلب
قول لأبن آدم في بلد
طــــالت معاناتُو
وتٍعِب سكانو
دايشين بالشرق
وحكامو باشين بالغرب
إحـنا اللي فاقدين
أيِّ شِي في الدنيا
مالكين كلِّ شي
بالفينا
بالحيل
ودا الدرب
والتابع الصاح ما ضِهِب
شِنْ الأفندية الكبار ؟؟
خدم المرابين التجار ؟؟
حشم المبارين الكِجار ؟؟
الأرزقية ؟؟
كضب كضِب
أحــنا التعابة ال بإختيار
صُرمتنا
ترتاح الديار
ينجمَّ بال بلدا
تِـعب نحنا الطيابة
الصِحْ كُتار
نحنا الغلابة أكبر حزب
لاب نتغلب ولاب نتقلب
والتابع الصاح ما ضِهب
يا .... هرشة
.نفخه زيف
كضب نحيا
وتموت
عرشك خيوط العنكبوت
قبَّال دا هزِّينا
و
و
ق
ع
الأعتى منُّو
بني وثبوت
لا بوت شفع
لا أجدى توت
لا غرب لا شرقاً نفع
لا رمِّي حرّاسة
ولَبوت
لا أحلام شمولية زلوط
فطّيس شيوعية
وفزع من حتَّى صوت شفع
كَعوت
يا من قلع للسلطة لع
تنجَى الغلابة
من الخزي
وشرع الله
يبرى من الشِفوت
؟!؟ ؟!؟ ؟!؟
*** ***
يا واقفة بين كهنوت وبؤس
خلَّى القلوب العامرة بوص
يا الديمِة حاضرِة
كما السمح
مشدوهة ذي أم العروس
الجايي لي خلقك قمح
والما دخل حلقك
دا روس
وأنا ما شي باكر
لى نفوس ناس
زي بعض
طوَّالي نحنا
معا بعض
ماب نرجى
عيدين الله عد
لا الطارقِة
من عافي ومرض
طوَّالي في ندِّي التميرات
العرَق
تدينا خير
غير العَرق
قفازا عاد يطلع
حِفي ويرجع زمان الحش
حَفي نكرع شرابنا
أكان عكار
وأكان صِفي
ومن ها البلد
نقضي الغرض
جرى بالحراجل
دمنا
وشاهقين دخاخين
القرض
عاركين بصارات
أمنا
أسراع رِضي
وأسراع حرد
نحرد
أكان غبَّ المطر
وعاب البحر
ما أسقى الجروف
ومنو ميسنا
نرضى عن المطر
منو ميسنا
نحترم الظروف
ونقلع عراياك يا بحر
وأماتنا جن
واردات صفوف
ربتنا العصي
والسيوف
بالسوط
وخبط الواطة
بالأرجل سوا
وطق الهوا
بين الكفوف
لو غاب ولد
فد حول
ومارجع البلد
فينا الخِفيِّف
يقفرو ويجي بالجنا
العوعى وقلد
دمّاعُو والحزن اليلوج
في عينيه ترعة ودامبرو
عٌقب الجنا
المن طبَّ حار لفَّ البلد
قصَّ وفقد
أول برد
بوّغ كرو
حاحى وحصد
جيَّه بنى
سوَّا السعد
تم المُنى
وضوّا الفريق
لآخر البلد
أسراع رضي
وأسراع حرد
حردت سعيدِة
عشان حِرد
في الليل سعد
صدّ الصباح
صيَّاحو صاح
ما الحوش بلد
هـ ــ ـوي يا قصيفي
الطانجي وِينا
الكور قبض
كانت سعيدِة ورا المراح
قابضاله غرّة
وقانقرد
كانت في كيم
المستراح
كانت قعد
تبدِي وترايي
في قص جناح الغرة
معط القانقرد
كانت ملعوتة
في صراع ما ليهو حد
فك فكَّتن
ساعة سماعه الكيك قبض
حست براحة
وبارتياح
ومعا بعض
الغُرة مجروحة الجناح
في سماها سابقي القانقرد
قالت -
سعيدِة دي
كان زمان
"حُمد ولد"
وسط البطان
وطارن على تمر البلد
وطارت قصيفي
على الصياح
كانت خفيفي
في لهفة جَد جيدن قبض
الطير براحو الصاح
يغنِّي في أمان
بلا نفَس انقبض
جيت آسعد
همست بعد
رمت الشرك
فوق كوم قرض
الزول بلا
تُكل الفزَع
فورن زبد
ويرجع
بلا صاج الشتاء
ال حالاًّ هبد
همست سعيدِة
سعيدي جد
همست سعيدِة
مع الصباح
خايفِة
الَحَرَدْ
أُومَت عيونن
لي بعض
أُومت عيونُن
بي وئام
ما ليهو حد
أقوى السلام
الدون كلام
لا إيد لا خد



والمنقد المخدوم وقَد
وأنا جايي جيتك
يا سعد
لا طانجة لا كوراً قبض
من قلدة دافي ودمعتين
فوق شوق خرافي
وبسمتين من كلمه واحدِة
وكلمتين
نعدل عوجنا ونتصلِح
نتصافَى ذي الوردِ
زين أصلو العوج
كانت فطين
ود خاله
جاب لها توب زراق
وأنا قلتَّ شين
توبك يذكِّر
بالفراق
توبك دا
حدت بو الرضية
على الحسين
وانذكرت
ذاك الهدم
هدم الملمات القراب
هدم الزراعي
من القراعي
إلى الضراعي
جري التراب الماب يجم
هدم العقاب
هدم القضية
ويا صنب
ساس الصواب
ماب ينهدم
وانذكرت
حجج الرضية
مع كمندان القسم
تطراها
بي ذات الهدم
الحجي
في جد الحسين
سر الختم
ولاّ الختم ؟
سر الختم
ولاَّ الختم ؟
ولاَّ الختم ؟
حرَّ النضِم
مدت صُباعه
غصن جريح
هز إيدا
سوط عنج الحسين
رعشة ضُراعه
جُضُل في ريح
رفعت أباطه
إلى النجم
"الزول
على قرش
العباد
ليش ما يهم
وليشاً على نتش
البلاد
ديشاً نهم
لو بالمتاجرة
في الجهاد
من دون جهاد
لو بالمكاجرة
والعناد
أجر البلاد
ما تنحكم"
كانت دي
كلمات الحسين
ذات مرة
في ذات القسم
وكانت في اسم
وكان الكمندان
نص خصم
نفس الشي
قام خنس الكمندان
منقهم
لو قال بغم
في نقط نقط
من عينا أُش
مرقت تقش
مرقت تلم
دمَّاعه
بي طرف الهدم
كانت
وكت
دقّ الختم
لمحت
طرف حبرايتو
فوق كتف الحسين
المنهزم
وإتذكرت !!!!
ركزاتو
حين في الدارة
يدمي
ومبتسم
شباله كان
بي شرُّو
ترجابو
الحسين
يا شالو صم
يا بين نسمتين
ينقسم
يا فوق كتيفات
النجم
والقمرة
زي ليل
يتردم
انذكرت ذلك
فطين
وإنو الرضية
الفد سفر
رسمت لنا الخرتوم
رسم
زي النعاين في
فيلم
أو بين حِلم
إنو الرضية
العد تعد
فوق اللدين
غيبة الحسين
المن متين
وآب تتلخم
حاشاها
تورط
في حديث
حاشاها
تغلط
في اسم
بين الرضية
وبين فطين
غير الأسية
صلة رحم
وفي الحلة
كَمِّين
من رضية
بلا الرضية الواحدِة
عندها فد هدم
مارقابو
ما قالت تخين
داخلابو ما نقّت
قِدم
قادلابو قبلي
ومغربه
ماكي اليفكرولك
حريم
لاكي المفكري
في الرجال
اللاخرين
هوي يا الرضية
بت ود مرين
التوب رفيق توبين
عقاب
شيلة الحسين
الجابه
بي عرق الجبين
اللا تزال
قاضي الورود
والمرقة
والقش
والطحين
والشي المهم
التوب رفيق توبين
عقاب شيلة الحسين
وانذكرت
نزلة حسين
قدلة حسين
حس الزغاريد
وين ووين
بِلِّيل حسونة
عديل وزين
السوط
وعرضات الرجال
وكيف الحسين
في الدارة جال
يضحك يمين
يبسم شمال
وطير الرهو
راحل جنوب
وقعت رهيوة
من الرهو
بين الرضية
وبين حسين
وطار ريشا
فوق عِمَّة حسين
اللسِه توب
دارعه الرضية
ومن متين
خلق الله
عينن في الجنا
لا حولة
من عين الرجال الحارة
لا يدُّوهو
عين
شر يا الحسين
العمرو في يوم
ما انحنى
غير للصلاة
وقطع الرحط
ونقح التراب
الزي ظلط
العمرو ما دنقر
خلاف
يرفعلو درفون
كيف حِمش
لاحق أمو
حرقتو الشمش
رفعو الحسين
رفس الحسين
لبَّ الحسين
ناتق
شرط جيب الحسين
قام الحسين
أدّا الشبط
فنَّا الشبط
أدا القرش
شنّا القرش
قهَم الحسين
درفون وحِش
تحت الشمش
فوق الشمش
هارا ويمش
بكى في القرش
بكى في الشبط
شوفة أمُّو
قرقر
وانبسط
طرَّى الرضية
أيام متين
الساقي هكعت
- يا الحسين
بنبونة وقعت
- يا الحسين
أمّونة ولدت
- يا الحسين
بونا أمو حردت
- يا الحسين
تالا الشرق
حدراتو وين
شافع غرق
مرقو الحسين
في صريف حرق
- رش يا الحسين
رفعة مرق
يرجو الكرين
مو برا الجدع
لكين متين ؟
قدح الفزع
خلا منو وين ؟
أول جراب
فاقش ضمان
قطعوا الحسين
آخر تراب
راقش زمان
زرعو الحسين
داير لي جنزير
الحسين-
داير دلو بير
الحسين -
منشار فرش جير
الحسين -
داير لي زول خير
الحسين
داير لبن طير
ألقى وين
- عند الحسين
هفّالو مشوار
للضعين
ما كان في بالو
لو مستعد
الناس قبلنا
لقوا الخبر
زي المطر
من دون وعد
من وين ووين
وينو الحسين ؟
مصروف
فردجواب
طِرد
برَّا الوصايا
مع البرد
يحفض حفض
لا عد يسجِّل
لا يعد
لا حولَ من
سفر الحسين
العاقبو مافي
تقول سفر
في القَمَرَة
أول من يخش
وآخر المغادرين
القطر
ما شفت زول
في الدنيا
يفرح بالكلف
فرح الحسين
المستبد بي طيبتو
زي برق المطر
مع إنو يتعاين
رزين
من شبَّ
في خير
ولاّ شر
طوّالي
في راس العوين
فسراعو
حاضر
أيِّي
زين
الناس يلوجوا
شمال يمين
أما الحسين
دغريتو دين
من قمنا
شفنا الشفنا
يوم ما شفنا
واقف بينَ بين
كُر يا الحسين
راجل العقاب
يا الطيِّب
المؤمن مصاب
والعين هي عين
وانذكرت
خلق الله
كيف ملت الدرب
تبكي التلِب
زولا الخزين
وبكت فطين
بكت ...
الحسين
من قلبو
ما دار الحرب
لكن شغلة الديش
كمان
جواك
جنس حرة قلب
وانذكرت
...
...
قبل الغروب
والنار تجقلِب
بالدروب
مارقين نلم تمر
الهبوب
بين المطر
قالوا الحسين
قام الجنوب
دا أول سفر
وآخر سفر
فيهو الحسين
لا شال طرد
لا جاب جواب
فيهو الحسين
وصّى الرضية
على العقاب
فيهو الحسين
دسَّ الخبر
وما قال
مودِّني الجنوب
عارف
وساويس البشر
خائف
ملاوزة القلوب
خلق الله كلّها
عد تكش
ساعة يرِد
ذكر الجنوب
!؟؟
دائماً يرِد
ذكر الولاد
في الخفف الدنيا
ومشى
وفي الما اتعرف
في يات بلاد
وشقيش غِشى
وفي العاد
وأريت ما كان
هُو عاد
يهرَى المصارين
من رقاد الموت
بلا موت
والطَلَق !!
ينحاشى لي
حبل الغسيل ؟!
يتخيل المشبك
طِِِِِلَق
..!؟؟؟
الليف يشوفو
دقن ضلال ؟!
حس الكرج في النيمِة
يسمعو
"جونقرنق"
وفي الما اختشَى
هاوسنا
بي سيرة الجهاد
ويقلب
معَ آذان العِشاء
هو دا يات جهاد
البات
يذهلل للولاد
ويطرطشه
الشاقَّي نصِّين البلاد
ومنقرشه
الفي بعض فاتن العباد
ومحرِّشه
وفي ذمتك
يا أرض الجنوب
عِن عينتك
الطيبة أم هبوب
فوق طينتك
أم خيراً بَرق
أحسن يشط
دم القلوب
ولاَّ العرق؟؟!؟ !؟!؟
ما شفتي
يا عينة الجنوب
كيفن ضراع الزول
سمِح
كيفن وراء محرات
يسوق
فد ليل
تلات مترات
قمح
ما شفتي كيفن
هي الرضية
المنهكة
صبرت مسافة
أمركة
وقدرت وراء التمرات
تزح
تمشي الأصابع
بين فرقة الشوك
عشان
شخلوب
تقاسي ورا
وتوِّح
شخلوب
على
شخلوب
فريق ربّا
وفرِح
نقارة
والدارات
تنحْ
ذات الأصابع
طنبرت
ذات الأصابع
بشرت
يا ختت الحنِّة
وتبلل
يا السمح
يا الفنجري
القدّامي
يا المأمون على
بنوت فريقو
بهار ملاحن
والملح
ما انذكرن لو
شلوخو كم
ويوماتي بينن
منطرح !؟!
الدغري يا دخري
الطيابة
الما شرِب
لا فكَّ ريقو
من الغلابة
وكلّو صِح
الصفّا دمك
وكان سبب
في ها الجرح
إنشاء الله
لا مسى
لا صِبِح
إنشا الله
يا بلدي المعمر
بالعشم
من سفَّ خيرنا
يكبُّو
مِح
وإنشاء الله
لا فاق
لا نصِح
بأسبابو
ينكسر العوج
والصاح يصِح
يا منهك
إشراق الغناوي
إنشاء الله عنك
ما استرح
يا مهلك
أشواق الحكاوي
على أدمى خاذوق
تتضح ؟
كل الرخم
كل الصقور
كل الحِدَي
كل النسور
كبرى الجوارح
في المطور
والصاقعة
في عز الهبوب
رحلت جنوب
تعزل من الرمم
المفقعة
في حشا الأحراش
مجدعة
دون قبور
الأرض زي يوم
النشور
قيزان من الناس
يترعوا
بخت الصبار
بخت الكلاب
بخت الصراصير
والقعو
بخت الضبابين
والباعوض
بخت الجنادب
وارتعوا
يا كل ديدان الأرض
ما تشتهي الأنفس
هِنا
في العد يلوكو
العد يسفُّوا
اليبلعو
كبد الزنوج
الوارمة
لسنات العرب
كلو البجا
المُو سالمة
يا غربان
مصارين الحلب
فشفاش ولاد النوبة
يا ديدان
قلوب ناس بحري
والجزيرة
كيمان العصب
زي القصب
قطّن كيانه
الكان عريس
جنضل فطيس
الريح يلوج بو
يفرزعو
رقشة خطوط القرمصيص
الدود ينغمش
في أصبعو
المقطوع
وكان أصبع وتر
فوق للمدرس
يرفعو
كان بس ملاح أمُّو
الوحيد
الطاعم
العد يقطعو
يا كفُّو
يا المجدوع
نقشة الحنِة
نُخَّام الطُراش
الضرضريرِة
المدِّي
والزغريتة
عُوُوُوُُوُع
الدارة
وطنو
التوعُّوا
أما الدموم
ماب تنفرز
ما انساطو وكتين
ترعُّوا
شهدت سحابة
اللت بلد
عز الربيع
إنو الجميع
قبال يموتوا
يدمِّعُو
مش كلهم
طينات غلابة
على غلابة
ووقَّعو
الغبا خرابة
فها الحرابة
تمن عذابه
بلانا مين
اليدفعو
ساقة قوانين الضهب
الزول يعاين الزول
مخادعو
ويتبعو ؟!؟
كرباً كعب
يا الله كيف
كان راح يكون
حال التعب
ديل لو وعوا
أن مافي داعي
لها العفن
وإن ما كضب
يسألنا الله
عن الوطن
قبل أيِّ شي
الله
الوطن
مش وزعو
وخلق البيفصح
والرطن
وراهو ما معنى أصبعو
وقيمة وشي
حتّان نزل
دينو الحنيف
الشرعوا
خلُّوني في رزقي
الجحيم
واتهنوا بي ذات
النعيم
واستمتعوا
ولاّ
أسـمعوا
مبسوطة بي عشقي
القديم
وآب ينهرد
شان أجضعو
وبالزي دا
وصَّاني الحسين
أتبع كُتر
ولاَّ أتبعو ؟؟
أنا لي وطن
ويجيد
وما أرضى أضيعو
لبة صراعي
أكونو أنا
وفي إيدي زماني
مطوعو
عود نار
عشان الخوة
تنجض بي هداوة
نولِّعُو
لا أحتمل عينين جنايا
يدمعو
بس مش كمان
تحت الحنان الفاوة
أربِّي مدلعو
دا غنا الحسين
الكان على نقر
الطواري يوقِّعو
وبنقر بعيد
صوتاً دنا
ما مستحيل
تحت العنا
تنفخ في أبناء السبيل
فجراً تكرهني
الغُنا
تقدر كتير
تقدرني أنا
تقدر طيوري
تطفشه
وتأذى الجنا
مش عد تشيل
النيل
يخرب ما تشاء
من أمكنة
بي كم قتيل
تقدر تدوم
عمراً طويل
في السلطنة
باسم الله
ولا الشيطنة
وارد حراق
نُص البلد
في جنح ليل
بي حرفنة
بس مستحيل
أن تجبر
الأبنوس
غصِب
يصبح
نخيل
والعكس
لا تتعب
تجُر خيط الفجر
تالا الأصيل
خل الوطن
يأخد براحو
كما الخميل
من كل لون
تابر جميل
ويا عدارئيل
لو كل طلقة
بدل أويل
تمشي
إسرائيل
كان هسه
في الأقصى
بنصلي قبل
عديل
ضحينا كان
في بيت لحم
نهنِّي بعضنا
في الخليل
ونغنِّي عازة
وراء الخليل
سمحات خلاص
بنوت بلدنا
وكت تشيل
غنوات
بدل
صرخات عويل
يا عازة ناراً
في القلوب
موقودة
سمُّوها
الجنوب
بالعافي
يطفيها الجليل
أحلم معاي
كالنيل عديل
من غير غرق
إنو الوطن
يصبح وطن
ولو مستحيل
من دون عرق
وإنسان درق
لي دم يسيل


وانصنتت
صوت المغنِّي
وراء الهبوب
في الضلمة
بين ورتاب
حزين
يبقاله زي
صهلي الحصين
شهّت ضهاريها
الركوب
والسكة طين
والطين خبوب
وانذكرت
سفر الحسين
المنّو ما جا
من الجنوب
وبكت فطين
...
...
بكت الرجال
المالها ساكتِة
على الغلط
بكت الزمان
القطَّ قطْ
بكت الرضية
مع القضية
الراقدِة برَّه
مع الحِيَط
عِز السقط
بكت البيوت
بكت الأيادي
التبني مستشفى
وتموت
بالسل
فقط
الترصف الشارع
زلط
وما تلقى تتعدى
وتفوت
من كركبات الأرزقية
المترفين
التالفين
الساقطين
ونقط ...نقط
ســـــــــــــالت
دموع ديش
من فطين
يشكن
خوازيق الحروب
عينيها كانت
في الشمال
والدمعة تنشايح
جنوب
ينصر دموعك
يا فطين
على كل
آفات القلوب
والتوب مو شين
ينصر بيوتك
يا فطين
في المعترك
على كل شاهقات
البيوت
الماها .. ياها
الفيها شك
الفاضية من رحمة
وخلا
الزيفه فُل
والزي خطاي
ماب تدخلا
يا كم تحس
بالخلخلة
ديك البيوت
اللا جاء منقذ منها
ولا الله يوم
رسَّل رُسل
منصلبطة الدين
الحنيف
محتكره بي اسمو
الحياة
ومالابو كتف الناس
ديون
وبلا
وعيا
ولى روحها
خير
وعمار
وضل
يا شيخنا هاك
يا شيخنا
أُكُل
كل المثُل !
لي مز قلوب الأمهات
في كل خانة
من الجحيم
سوْ لك تُكل
وأعزم عليْ
كل النفوس
الزايعي
فاتحي
بلا حيا
الترتزق
لا حولَ
حتَّى من الكتِل
ومو دايره
موت الناس يقِل
الموت يقيف
شغلن يقيف
زي الرواكيب
في الخريف
والغيم تِقل
وإنتِي الملوكي
هزيمة
يوم فضُّوا الفريق
من حس حبيِّب
صوت رفيق
يا لافحِة صبر الأنبياء
ولاحقابو
نُصِّك في الطريق
ينصر دموعك
يا فطين
علمني مر دمعك
أضيق
شان بكره
تتوسع
دروب الدنيا
زين
علمني أفيق
فوقة الرضية
بعد حسين
الوين مشى
اصلوالبصون
حبانو بتعلم
يصون
أوطانو
والخاين يخون
دون إختشاء
*** * ***
أنا ماشي
للبيت القبيل
الديمة يفتح لي حنون
طيبة حشاهو
ينقرشه
أزهار بسيمة يفرِّشا
لا إنت مين ؟
لا كتَّ وين ؟
وين بالكتير
شفقتنا
وراجين سعادتك
بالعشاء
مع إنو في الحلِة
الأمان
أكتر من أهوال
الزمان
وقدر الطيابة
الفي الحَشا
وياهو الأكل
في كل بيت
قُرَّاصة بي حبة ملاح
أو بي غباشة
مرشرشة
ولا كشكرة
ولافي إختشا
الفي البطون نفسو
اليتاوقك
في العيون المدهشة
...
...
وين يا بيوت طين
بي نِشاء
اتكرفك
إتقيفك
إتقريفك
إتكيفك
بي إنتشاء
سكران
ونص الليل مشى
وخنست بطون
القرقراب
خيم على الحلِة
السكون
والصمت عشعش
عشعشة
فوق ناس تعابا
من الدغش
في الفيها
لا بعد العِشاء
حال الغبش
بدري بتنوم
شان بدري
تجري
معايشة
الكل نايم
غير شدر
غافر العصافير
من خطر
في الريح تنفس
بانتشاء
أو زول بيريد
داق السهر
مع حس مغني
وراء البحر
طنبور حنيِّن
ونقرشة
لولا الطنابير
البيوت
الأجبروها على
السكوت
العودوها على
أيِّ موت
ما أوحشة
هونيق حمير
جنب الحفير
هوهيو كلاب
تالا الحقاب
يا حس كدائس
وكشكشة
معناتو نص الليل
مشى
وخيَّم على الناس
السكون
والصمت عشعش
عشعشة
معناتو جُوَّ البيت
يكون
ركَّة رهيوة عاشقين
برَّا التواريخ
والزمون
في حالة
لاب تصله الظنون
لا حِديْ عيون
الشامتين
لا صقر واشياً
وشَى
بلدي أم سَمِح
فوق الجرح
ما أدهشه
وأنا جايي أبعبش
بعبشة
هُو أنا إيه أكون
غير إني
واحد العاشقين
الكل ما ضمّوا
الجفون
ضموها فاتحين
العيون
على غيمة الحلم
اليصح
في بكرة والحاصل
يهون
والدنيا تصحى
وكلُّو صِح
يا أهلي
هُوي
إزيَّكم
إن عش قريِّب
منَّكم
وإن مت غريِّب
فليكُن
ياناس طيابة
بغلبكم
بنصاح ضراعكم
وقلبكم
بكفاح صراعكم
وحزبكم
برياح شراعكم
أحبكم
بسماح شعاعكم
ألبَّكم
لصباح ينور
دربكم
...
...
لهلب جمير الشوق
وقد
وأنا يا بلد
نعّس قواديسي
الشجن
والتور من السيسيق
حرَن
وغير الدرادِر
ما حصد
يابحر أحمر
ياسفن
يا جلود مهرّبة
يا عقول
يا صمغة
سمسم
فول
قطن
...
...
أنا ماشي
من قرف المدن
أنا ماشي
يا هادي الحزن
من لا نِي منك
لا نفد
من لا نِي واقف
لا قعد
ماشيبي بالفي
للأبد
زي غصن وردِ
جريح
وحيد
وين ما يلاقي الطين
قبض
أو فرع حنّة
طفشبو ريح
وبعيد بعيد
والشوق نبض
في أحلى إيد
بت ناس قبض
أنا ماشي
لا خوف
لا جُبُن
لكني راجع
في زمان
لا آهة فيهو
ولا غبن
وما بيني بين الحلم
سد
والدنيا ماها
ملي بطن
بس ماشي أهلنا
أهلنا جد
هيي
يا عصافير النزيف
التمرق الخير
والسعد
للغير ويجنيها النكد
يا قانقرد
صبر الرجال
يا طيرة
صقر الرأسمال
أنوسد أعشاشها
ورقد
ما أنحاشا قزقز
بالعيال
عقبان
حمد
سيدو
وغمد
يلاكي
ماك ماشي
البلد
أم قلتي لي
أحدٌ أحد
حتَّى الطراوة
أو اللحد
لا بدَّ وإن طال
الأمد
يختا البصيرات
الرمد
طرِّق صراعك
يا ولد
غرِّق ضراعك
تلقى حد
للآفة والحال
الموهو
ضد العوارض
كون جلِدْ
ظل مركب الطوفان
ونوح
بحر الفجائع
عدُّو عد
يا ابن الغلابة
المتعبين
شقِّيش تروح
ياها البلد
سيْ ياولد
أحدٌ أحدْ
حتى الطراوة
أو اللحدْ
...
...
مطرِك متين ؟
مطرَك
متين الأرض
ضاقت بالخبوب
واستنفرت غيمة
الهبوب
من وين ووين
يحرق عروش
الظالمين
والعيشتو واقفِة
على الحروب
ما يخلِّي فيها
من الضلالي
فرد دقين
بعدين
مع الدغش
أب ندايةً
بيضا زي نية الشعوب
ينبت طيابة
مسالمين
وخُدر قلوب
وعديل
وزين
وانذكرت
...
...
سفر الحسين
المنّو
ما جاء
من الجنوب
وبكت فِطين.....


 


رد مع اقتباس
قديم 2011-07-13, 11:25 AM   #54 (permalink)
ابو مياس


الصورة الرمزية ابو قزح
ابو قزح غير موجود حالياً

بيانات اضافيه [ + ]
 رقم العضوية : 24
 تاريخ إنضمام العضو :  May 2011
 أخر زيارة : 2011-10-24 (11:51 AM)
 المشاركات : 570 [ + ]
 التقييم :  50
 الدولهـ
Sudan
 الجنس ~
Male
 MMS ~
MMS ~
 SMS ~
سمحه وسمريه
محبوبتي
ولفتاتا غزاله
لوني المفضل : Darkmagenta
إفتراضي رد: مكتبة محمد الحسن سالم حميد



محمد الحسن سالم حميد
أملي قلبك


أملي قلبك بالوطن … بالصغار
قومة العمال دغش … بالنضار
المزارعية الغبش ..
بالجنود الوين تخش ؟؟
في سبيلك كالنهار
بالمداد الما بيغش ..
بي وتر جاء من الجحيم
أملي قلبك بالنسيم
أملي بالطير الرطن
طالما العالم قديم …
ينكسر ريح … المحن
خلي بالك مستقيم
دغري وإن مال الزمن
راحل الليل البهيم
والبصيرات ما عمن
الظروف الليلي أبن …
روقي لا خوف لا حزن
باكر التقيات تنورق …
وتنملي الضرعات لبن
طيبة يا صمت الحنين …
كلما طقاهو هم
لافي آهة ولا أنين …
لا بيروع ليح ودم
من مرارات السنين …
من عصارات الألم
بيمرق الشوق الدفين …
بي كعنكيل العشم

أحكي ليك يا طيبة حكوة
ذات زمان من ضيق وقسوة
وكل يوم من بارحو أسوأ !!!
والمراحات قاطي قط
فجأة في قلب السما …
غيمة غيمتين ..
غيم ربط
كتمة حتي الطين عِرق
والشجر قرب يبق
إلا يا طيبة الخلق …
من بدل تفرح تنق
الشكايات … و السخط ..
لا السحاب داير يصب
لا الهبوب دارت تهب
نسمة نسمة آ رب نقط
من شمالك من جنوبك
الهبوب يا رب هبوبك
من شروقك من غروبك
من تحت من فوق هبوبك
كتمة كتمة معاها ضيقة
نسمة يا رب الخليقة
سكت الأطفال دقيقة
نبكي خشع .. حول في حول …
ظاهر الحال ماهو مخفي …….
وفالنا فيك ما فيهو قول
يا المبرد والمدفي ..
نسمة يا رب الفصول
نسمة كل راس ساعة تكفي ……
نسيمة واحدة لألف زول
ينطلي الجو بالحمار
فجأة من حر لي غبار؟
الطشاشات الدوار
السبابات النقار
نقة الضيق تنطلق
قلنا فاقت باتت أزحم …
الغبار من كتمة أرحم …
أرحم الحر البيلحم …
لا ده لا ده ولا فرق
طيبة تمي الحكوة قولي
الصبر خلوقو هولي
ده الزمن يقسي ويرق
وتم نشيدك في الحلق
عد فات الريح شرق
من بعد جاب السحاب
من بعد قش التراب …
مشط القش والشجر
رجع للطير للوكر
ها البرق شال البرق ..
الرعد ريحة الدعاش
ابشروا بالخير نقطت
أي والله المطر !!!


 


رد مع اقتباس
قديم 2011-07-13, 11:26 AM   #55 (permalink)
ابو مياس


الصورة الرمزية ابو قزح
ابو قزح غير موجود حالياً

بيانات اضافيه [ + ]
 رقم العضوية : 24
 تاريخ إنضمام العضو :  May 2011
 أخر زيارة : 2011-10-24 (11:51 AM)
 المشاركات : 570 [ + ]
 التقييم :  50
 الدولهـ
Sudan
 الجنس ~
Male
 MMS ~
MMS ~
 SMS ~
سمحه وسمريه
محبوبتي
ولفتاتا غزاله
لوني المفضل : Darkmagenta
إفتراضي رد: مكتبة محمد الحسن سالم حميد




مني متعشم طلوعك ..
كلي مستنيك تعودي .. ويغسل الساحات رجوعك
في حشى أحراش الليالي منتظر بقة شموعك
تشتلي الضو في الضهابة .. ترخي للجايعين ضروعك
يرجع الطير المهاجر .. يملأ في الفجاج ربوعك

في كلام الناس بفتش .. بين عوينات المدارس
في صدى آذان المساجد .. ورنة أجراس الكنائس
في إندهاشات العذارى .. في إرتعاشات الموامس
في بحر فرحان يبشر .. موجو لي جية النوارس
الرواويس طمبروك .. وهز بيك في الدارة فارس

بين سكات القرية أفتش .. بين هضاريب المدائن
يا نسيماتاً تكربت .. شايلة أشواق الجنائن
لي جديول حلقو ناشف .. أو عَرَق تربال يكادن
في وشي الأفراح بفتش .. بين قفا اللحظات أعاين
بين سواقير الفقارى .. الجاية من تالا المدافن
مرة طال الليل عليّ .. ووصلت الآهات مداها
قلت لي النجمات مو جايي .. قالت الأيام تراها
يا ضيا القمرا القبالي .. شوكة الظلم الخيالي
عسمت فوقنا الليالي .. خبي في إسراعك تعالي
يا مناقش العدالة
بتنا فوق الصبر عالة
يا تعاويذنا وعزانا ..
خلي نور الفرحة يطفر من عوينات الحزانى
صخرة الأحزان تقيلة .. ونحنا ما بنملك سوانا
قولي هيلا هوب معانا .. من على الشارع نشيلا
سكة العمر الطويلة .. ترتى في الجايين ورانا
صرنا زي رحالة عنك .. فتش الكون تبني لبني
وراح سأل طيانة تبني .. وقالوا جاية
بالعوينات البقومن بدري شايلات القراية
في تلوت الليل تبوغ .. سارقة للدنيا السقاية
ولما تورد .. بنسلينا الجردقة .. القرض .. المحاية
جاية من ضهر المسافة .. البين بناء الطين والسرايا
طالما في الدنيا ناساً .. فاتو للجايين فداية
وناس على جلاتا تكتب بالثبات .. والنيل دواية
جاية .. جاية
دفة التاريخ في إيدا ..
دم عروق أماً بتنده راجية نص الليل وحيدا
بيتت في القلة مويتو .. وزادو في المعلاق عصيدة
جاها في جواب يسلم .. للبلد داني وبعيدا
يمة يا نفس الوصية .. الكل ما شرقت نعيدا
يانا يا شخب القضية .. الصافي في قدح القصيدة
مانا قنعانين تملي ..
من دواية الصبر نكتب فينا والإصرار يملي
تنعدم موية وضونا .. بيها نتيمم نصلي
الزمن ينقض وضونا .. تاني نتوضأ ونصلي
ونمشي فوق دربك نباصر ..
في الرمال والشوك نحاصر
بي شعاع بكرة المسافة .. سطوة الليل والعساكر
تنهزم ريح العوارض .. والمواريث التعوقك
ومن شقايا الحال تبقي .. وتقدح التاريخ بروقك
وكلما مرقت غبينة .. تمشي لي داخل عروقك


 


رد مع اقتباس
قديم 2011-07-13, 11:27 AM   #56 (permalink)
ابو مياس


الصورة الرمزية ابو قزح
ابو قزح غير موجود حالياً

بيانات اضافيه [ + ]
 رقم العضوية : 24
 تاريخ إنضمام العضو :  May 2011
 أخر زيارة : 2011-10-24 (11:51 AM)
 المشاركات : 570 [ + ]
 التقييم :  50
 الدولهـ
Sudan
 الجنس ~
Male
 MMS ~
MMS ~
 SMS ~
سمحه وسمريه
محبوبتي
ولفتاتا غزاله
لوني المفضل : Darkmagenta
إفتراضي رد: مكتبة محمد الحسن سالم حميد



نفسي أقدّم لك جميل

نفسي أقدّم لك جميل
وفي حدود الإستطاعة
فليكن هذا الجميل
غنوة بين الناس مشاعة
ولاّ سرية وتقاوم
في الجمود .. حمّى المياعة
المهل ضيقا النبيل
شان بلد تاخد وساعه

غنوة قالت يستحيل
يصبح الأسف البديل
للتماسك والتواصي
بي مشي الدرب العديل
راح تموت البركة بركة
واللي نيل راح يحيا نيل

ويا عروق السنبلاية
الأرض ما قط خيرة
لسَّه يا بيوضة جايي
ألفِ غيمة وألفِ غيره
لا تزال القبلي طايي
والأرض باشة عشيره

خابرتني نسيمة شافت
طيرة خالت لي شديرة
من الشديرات التلبِّد
كلمة السر في صديره

والعصافير ماب تكضِّب
لاب تحوم فوقا الإشاعة
قالت النار إندلاعه
في المساخر حار قراعه
و لابد الدنيا وضِياعه
عنوة ترجع لي جياعه

وينطلق ضهر التواريخ
المعبية سيرة .. سيرة
تجي الطراوة ..
تجي المطيرة
تجي النقاوة
تجي الدميرة
بحر غنانا من الحجيرة
يغرِّق الذمم العضيرة

وللتقدم بي هداوة
التلاميذ البي خيره
بي ضراوة
تدق براوة ..
وبي شقاوة
تسوّي قيرة
للمطيرة المافي غيره
راتي ياخد لي خبيره

تحكي عن عزة مهيرة
رزتا وهزة ضراعه
نفرته الولد المظفَّر
وكيف سفه دنياه ومتاعه
في سبيل سودانو قطّر
دمّو سطر فكرو واعي
سرُّو كان في اللهُ أكبر
ونفسِ شورتا بي جماعة

نفسي أقدِّم لك جميل
فليكن هذا الجميل
حكوة عن عبد الفضيل
التماسَك وما تداعى
ولاّ عن عبد اللطيف
ورحلة المنفى الشجاعة

سنَّ حنجرتو الخليل
بينو بين حجر الجداعة
وكان مسبب من قبيل
وانتفض فارس رفاعة

شلتَ من جودة الرماد
وقمت مورقت الزراعة
بتَّقت كل البلاد
بي ولاد طول باله باعه

شهداك الهيلا قاموا
وبوغوا التاريخ جداعة
توروني وراحوا ناموا
في حِضن سيد الوداعة
اللي ما خان الوداعة

حملوني أمانة أغنِّي
معجزاتك بي براعة
ولا أبالي تكنِّي جنِّي
ماهُن أدُّوني الشجاعة

يا برية متل جناياً
مستمِخ حصة رضاعة
أو شقية متل غناياً
سرُّو يدِّينا المناعة
ضد مناحات التسول
والتوسل والضراعة

أيوا أحبِّك لا شكية
لا حراق روح لا إلتياعه
ذهني قادر بيك يفكِّر
إيدي قابضي على يراعه
لي ضراع أخضر يخدِّر
وكفِّي فالح في الصناعة

في بحار الحق مراكبك
ليْ صلاح يعجب شراعه
فيِّ سِر نهمة مواكبك
دون جرائد وهوشة إذاعة

ويات مطر بتشاور الريح
والبوادي دغت مجاعة
يات سيولاً ترجى تصريح
ولاّ تصديق لإندفاعه

ماب أبدل فيك وأساوم
لاني تاجر لاك بضاعة
شعبِ غلباوي ومقاوم
وأمّة ما أنبل طباعه

قول ونسمع لي كلامك
يا وطن سمعاً وطاعة
قلبي ضاق بالغنية حامك
ورؤيا زيّك في وساعه

نفسي أشهد من غرامك
آخر آهاتك وداعه
وتشرق الدنيا السلامك
بينا يتبختر شعاعه

لو أغنّيك عمري أجاهد
وإستلف من ميتِّي ساعة
ماب أوفّيك دا أنا واحد
وإنتَ أمجادك جماعة


 


رد مع اقتباس
قديم 2011-07-13, 11:27 AM   #57 (permalink)
ابو مياس


الصورة الرمزية ابو قزح
ابو قزح غير موجود حالياً

بيانات اضافيه [ + ]
 رقم العضوية : 24
 تاريخ إنضمام العضو :  May 2011
 أخر زيارة : 2011-10-24 (11:51 AM)
 المشاركات : 570 [ + ]
 التقييم :  50
 الدولهـ
Sudan
 الجنس ~
Male
 MMS ~
MMS ~
 SMS ~
سمحه وسمريه
محبوبتي
ولفتاتا غزاله
لوني المفضل : Darkmagenta
إفتراضي رد: مكتبة محمد الحسن سالم حميد



بيروت رِبَاة بارُود


حبّت تمُوت
بيروت !
..
تحرَق ..
حراق الصوت !
..
تغرَق ..
غراق الحوت !
..
زي طائر
الفينيق
المامناسبَ الموت !!
على كيفه
حرّة تموت !؟
..
أصلاً رباة بارود
من دون
بَرُود
وحَنُوط
زي لَمبَة الحانًوت
مِتعَوِداهُو ..
الموت !!؟
..
شان آخِر العنقود !
والأُولَى
في البنُّوت !
دون المُدُن
بيروت
الموت مَدَلِّعه
مُوت !!
مدِّيلَه سبعة
حيوت !
يوما التموت ..
هُو يموت !!
..
يا بِت
عليكي سلام
جيّاش وما مشروط
أحلامنا
تبقى أحلام
وبأوهامه
تمشي زلوط !!
..
مافي الوتر
ده كلام
فارغ ..
ملانا سكوت
عبَّ المطر
نسّام
راس الشدر منكوت
..
تلقاني أنا الإنسان
بتشهَّى دايماً
يُوت
جيَّة زمن حنّان
ومالي نفِس
في الموت !!
..
سارجَ الهواء
المجَّان
على كيفي
وين ما أفوت ؟!
..
بالفيِّي من وجدان
جاسر
على الجبروت
قادر
على الطغيان
والطاغية
والطاغُوت ؟
..
كم مَرَّة
يا لبنان !!
تابوت
وراء تابوت !؟
ومنُّو .. وجديد ..
غليان !!
تنزِل من الملكوت ؟
..
يا أرضة
نحنا حجار
جرَّبنا كم مارُوت
يلقانا ..
ما يحتار
ذات الغلَب هاروت ؟؟!
...
هدِّمنا ..
يا طيّار
ما تخلِّي فوقنا
بيوت
عَدِِّمنا ..
نفّاخ نار ,,
أطفالنا سُوطُن
سُوط
تلقى الدفنتُو
بِِذار
تِحتَ الدم
المحتُوت
..
أوَّل تجي
الأمطار
من حلمنا
المبعُوت
حالاًّ تضج
الدار
والطير يغالِط
صوت
أطفالَه
والأزهار
قاشرة
وتلوِّح يُوت
..
الإيد دوَم
في الإيد
والاِبتسامة تفُوت
يوماتي
عربون عيد
بالأمنيات مغمُوت !
..
من تاني يا حقَّار
بالله
قَبلِ تفوت
دفِّق عجاج النار
صُب ما تَصُب
من موت
وما فيكَا من جبروت
دُوس الحشا
بالبُوت ؟!
..
بس كلّو كلُّو
يفوت
ومِن معصَم البنُّوت
تمرُق
كما الياقوت
منُّو .. وجديد
بيروت !!
..
هادي الفضا
المحروت
بالطائرات
الموت
يملِنُّو بالزغروت
برق المطر
هط سوط !
..
..
الليلة لِيل
والليل
غير الزمان
وقِبيل .؟!
ديل الأبَت
ما تشيل ..
غِيرُن ..
ضهُور الخيل !؟
..
حُرّاس ..
وكيف فرّاس
يتحدُّوا ...
مُرَّ الويل ؟
رأساً ..
مارون الراس
قدماً ...
لِبِنتِ جبيل ؟!
..
..
*ولدي ..
الدرب دا طويل
دايرَ النَفَس
بالحيل
..
خبِّر جمال الشيل
من خطوَة ..
يبدَا الميل
..
قصَبَة مدالقَ السيل
قطعاً ..
خدارَه تقيل
,,
راس الجبل
مُو نخيل
وين ريحُو مال
هُو يميل
..
فُوت اليجيك
في فتيل
للبين رياضو أصيل
..
فَزَع الأخي
مُو دخيل
والماطراكَ .. بخيل !!
..
سِحرَ العيون ..الريل
وين ,,؟
يوم دماها تسيل ..؟
..
دمعاً قبيلة
هميل
ما جففُو المنديل !؟
..
خل الوراك
لله
وابرَى الدرِب
دا عديل
يا جِِبتَ حَد
للآه
يا رُح فداكَ
كتيل
...
- شكراً ..
يا ابويا جزيل
شكراً ..
لإسرائيل !!
وأمريكا أمَّ الويل ؟!
...
ظنَّت –تعالى-
الله..
سوّاها عزرائيل !!
لابُد تشيل الآهـ
وما طفَّفت من كيل !
...
شكراً ..
لكلِّ عميل !
مِنَّ الفرات
للنيل ؟؟!
..
ديل علَّمُوني
أشيل
حِملي المخيف
وتقيل
وحداني
فوق كتفي
دام كتفَ أخيِّي
شلِيل !!
..
عُذراً ..
كتير لبنان
صبراً
على التنكيل
..
فِعلاً
هي الأحزان
تمِن إنِّك
أبقى جميل !؟
..
سيِّد ديموقراطي
قِدّامي دُغرِي
عدِيل
حاضِر على الآتي
والماضي أصلُو أصيل
..
يا أروع الأوطان
يا مَن
تكيل العين
بهجة وجمال فتّان
"قانا"
أفرَعِك من وين ..؟!
ولاَّ أفزعِك
بي مين ؟؟!
"يا صيدا"
والغزلان × فتنتك
× أتنين
..
لبنان ؟
سُمُو الفنّان
عُرفُو ؟!
وتراثُو .؟. ودين ؟!
أنهار ..!؟
وطير ..؟! وجنان !؟
غلمانَه ؟!!
حُورَه العين !؟
ساحل .. ؟!
سهول .؟. وديان .؟
رملُو ..؟!
وجبالو .؟. وطين ؟
وما فوقو
من إنسان ..!!؟
..
بيساوي === جنديين !!؟؟
..
أم أنَّ هادي النار
هادي الدمار
الشين ؟؟
هادي الزفار
الحار
مِن أجلِ جِنذيين !! ؟
..
يا خُبثِ ذاك الفأر
جاب التراب
مِن وين ؟!
كُل الشَب المدرار
ما رَوَّقك ...
يا طين ؟!
..
لا أشتُم العربان
والواقِفِين
بِين ..بِين !!؟
..
فليمدَحه الخُذلان
وعار الفِرَج
لا وين !؟
..
عالَم بيتفرّج
على دم يلُك العين
وآخر بيتحرّج ..
الله ..
ده عالَم وين ؟؟!
.
$ جيش مصر
يحمي مصر !!؟
علَى مصر لا تثرِيب
بس عَن وطن
في الأسر
- يا حُزني ..
يعني غريب ..؟
أم يعني
مَن في القصر
مَا يحمي تلاّبيب ؟!
..
شرفان فتَح دكّان
العين على
الفي الجيب ؟!
ما ليهُو بالأوطان
غير كم تُرابَه
يجيب !؟
..
مِنتلِّح الأديان
بالعيب
تغطِّي العِيب
غط عورة السلطان
تكشِفلُو
ما في الغيب !!؟؟
..
من نار
دخانَه ... لسان
غضَب النبي
الغلِّيب !
..
$ درب السلامة
قريب !
..
* درب السلامة
نسيب
فاضي الكلام
ما يجيب
بهماً
جَرابًو الضِيب
..
ضيباً ..
في واشنطون
وآخر
في تلابيب
تالت تِحِت قانون
قانون دمار ..
تخريب
روعة نظام الكون
يرتَع وسطنا
قريب !؟
..
دايرين حياتنا
تكون
حُرقة ونواح
ونحيب
..
لكن ..
وربَّ الكون
هادي الضلامة
تخيب
الروح فُراقَه
يهون
شان عزّتك يا حبيب
..
يا دُخري تربَى
بدون
خبزِ الغريب
وحليب
الأرزقي المأفون
بأعشابه
"شَبعَا" نطيب ,,.؟
..
دا وطن ..
وأنا المفتون
بي أهلُو ..
سهلُو ,, خصيب
أمسِك عليك
العُون
أنا هُون
طَلعبي ... نصيب ؟
..
بين المعزَّة مصُون
يا بوي
في أحَنَّ قِلِيب
..
من لحمَنا
المحرُوق
..
من دمَّنا
المدلوق
..
من رِحمَنا ..
المسروق
..
مِن حِلمَنا ..
المشنوق
..
مِن قلبَنا
المطفوق
بي حبّنا
المذنوق
لي شعبنا
المدقوق
بيناتُو كَم خاذوق
..
من جوفَنا ,,
المشرُوق
,,
من صفَّنا ,,
المشقوق
..
شدَر الوطَن ..
مَخَلُوق
دايماً ..
يطُول لا فُوق
..
ويا فُوق ..
رعُود وبروق
أنزِل ..
مطَر ..
ما يرُوق
إلاّ ان يرُوق
الشوق
بأنبَل
وأعزَّ شروق
..
وتطلَع فجُر
لبنان
مِن عضمك
المسلوق
..
المجدِ للإنسان
والكون
دا ما مطلوق
؟..؟
لبنان
يظَل لبنان
رُغمَ القَهَر
..
يا ..
عِلـــوق ؟؟
..
الدم
سُقا الأوطان
وللقادمين مارُوق


 


رد مع اقتباس
قديم 2011-07-13, 11:28 AM   #58 (permalink)
ابو مياس


الصورة الرمزية ابو قزح
ابو قزح غير موجود حالياً

بيانات اضافيه [ + ]
 رقم العضوية : 24
 تاريخ إنضمام العضو :  May 2011
 أخر زيارة : 2011-10-24 (11:51 AM)
 المشاركات : 570 [ + ]
 التقييم :  50
 الدولهـ
Sudan
 الجنس ~
Male
 MMS ~
MMS ~
 SMS ~
سمحه وسمريه
محبوبتي
ولفتاتا غزاله
لوني المفضل : Darkmagenta
إفتراضي رد: مكتبة محمد الحسن سالم حميد



يا متخبية خلف وضوحك


يا متخبية ...
خلف وضوحك
أمرقي داخُل ..
تلقي الغيم الطاش
إتلقط
لمّه وربَّط ..
ربَّط ونقّط
نقّط ورشّى
الغبن إتفشّى
القابض طينك
وطاب في دوحك

يصحى الشجر اليابس
أخضر
يضحى الأخضر
زائد وأنضر
يرجع طيراً
غِصب إتهجر
وشوش ..
عشعش ..
وعمَّر روحك .

يترى الحلم
الفينا إتحجّر
وندرأ نزوحك
تالا المدن ..
المصّت دمِّك
ودسَّت فوحك
قسّت همِّك
وقصَّت موحك ..

يا متخبية ...
وأنا مفضوحك
رنّة فرحك ..
صنّة ترحك ..
وين ما أقبِّل
ياني بروحك
أي مرتكب الصاح
ونصوحك ..

كَجَر الصمتِ
وكت داهمني
كنت متلبِّس ...
بي غنواتاً ليك
إتكرمن
من سر بوحك
للأطفال
بالزمن الجايي
الزمن الطيِّب
زمن الخير
الجالبة فتوحك
يقفل حرباً ..
باحتة جروحك
وطوفان جدباً
محّن نوحك ..

كبّر طفلك
ونشّن حجرو
قام الصمتِ وكجرو ..
إنكجروا ..؟
إنعدِّيتي ..
وشبّت أزمة

بين فرقات
الضو والعتمة
شقَّ نسيم
لي عِرْق الكتمة
خالَ النخل
العاول طوّل
قال وإستشهد
بي عمَنَوَّل
"المنحوس ..
هجّر تربالك
والمجروس ...
يا الردم الجدول
ودكَّ أطفالك
تحت الردمة

وقامت طلقة ..
تجاه النسمة ..
الساكنة النخل
العالي الأسمى ..
حاض الطير الحامل ..
هجمة
طرح الغيم الشايل ..
صدمة
داخ النحل العامل ..
صُرمة

رجمة ورجمة
في حلقَ الليل
إنشرقت نجمة
رقد النيل هبّود
بالوجمة
نفدت شيمة
بقدرة قادر
طارت غيمة
وصارت باكر
باكر رحمة
مدّت
وندّت
وشدّت
خيل الحيل
بالبسمة
نخل الغبش
الدغش إتلمَّا
الأبنوس الجاسر
يمّة ....؟
هبَّ تبلدي
تحدي وهمّة
وبحر المالح
كبّر وسمَّا
"الأديان
في القلب
يا أمّة
والإنسان
في الدربِ
أهمَّ"

البلد إتحول
بي مسموحك
ناس بتكاتل
لأجل سفوحك
ما يسقيهن
غير فد جدول
جدول
خيرو الخاوي
نضوحك
لا أشواك
تحميك تتجوّل
لا أسلاك
تنصلبط سوحك

يا ممتلية
كجوفي فجيعة
وآخرك أوّل
أو معتلية
كطمي الشوق
القلب الماحل
راحل طوّل
زي دعوات
الناس الظُلَّم
لمّا عليها الغول
إنغوّل

حلمي مدردح
دخري فقارى
إرثو ...
ضكارة
جسارة
بصارة
بإيد كرّاسو
وبي إيد فأسو
لو لا إحساسو
بعزّة ناسو
كان تكَى راسو
زمان وإتسوّل
زولاً طبعو
يفجِّر نبعو
بدّع زرعو
وماسك الأول

سوَّى حضارة
وشرَّف لوحك
شرحو ..
شروحك
مسحو ..
مسوحك
يفقد عطفك
ويأبى ينوحك
غامل يوم
راح ترجعي فيهو
ومجد بنيهو يلاقي
صروحك

جهراً ترجعي
ياوضّاحة
يا مرفوع للقوّة
صمودك
صبر الناس
اليوت كدّاحة
لنضرة عودك

المارقين
الذمّة هجائر
الساكتين
فوق رأي
وبصائر
مطر الحق
بالحيل سحّاحة
ناراً بق
لليل صحّاحة
شالت وجع الحال
في أصفاحه
وتنزف شان
ما تبرى جروحك
وتعبك راحة

شدِّي النيل الأبيض
فرسك
وفيض الأزرق
فينا جموحك
مقداف فألك
ومرسى طموحك
الإنسان اليسمع
بالك
يعرف مالك
يفتح خِزَنو
و يستر حالك
يلفح إجنو
ويقلع نالك
يكتل حزنو
ويروي قموحك
رافع رسنو
وراتعة أمبوحك

تنمسيبو
هديراً طيِّب
وتصحي
خرير الفجر
صبوحك

عشتي آواضحة
وراء مخباكي
ويا متخبية
خلف وضوحك
عشتي أصيلة
كأرضك ونيله
ومرتع واحد
لألفِ قبيلة

يا ال لبنايتِك ..
من غنمايتِك
يوم ما إنطفت النار
في لدايتِك
غيَّر زيرك
ولاّ ملوحك

قدمك قاشر
قطع الفاشر
سمسم باكر
باهي مسوحك

سترة بدنك
قطنة وطنك
طينك سكنك
نبضك مكنك
عرفك فطَنك
تبري جروحك
يا الطوفانك
صدراً ماهل
وشرف العزّة
الأحمر
نوحك
من دعتاية الزمن
الكافر
ينصر دينك
وتسلم روحك

تسلمي واضحة
وراء مخباكي
أو متخبية
خلفِ وضوحك ؟


 


رد مع اقتباس
قديم 2011-07-13, 11:30 AM   #59 (permalink)
ابو مياس


الصورة الرمزية ابو قزح
ابو قزح غير موجود حالياً

بيانات اضافيه [ + ]
 رقم العضوية : 24
 تاريخ إنضمام العضو :  May 2011
 أخر زيارة : 2011-10-24 (11:51 AM)
 المشاركات : 570 [ + ]
 التقييم :  50
 الدولهـ
Sudan
 الجنس ~
Male
 MMS ~
MMS ~
 SMS ~
سمحه وسمريه
محبوبتي
ولفتاتا غزاله
لوني المفضل : Darkmagenta
إفتراضي رد: مكتبة محمد الحسن سالم حميد



حمتو


لا متين يا هم تشرق
الزمان : الساعة سايرة
المكان : فوق أرضو دائرة
حمتو قاعد .. والحدادي الفيها قاعد
من جهنم طايرة
بالحديد الواطة فايرة
والعرق نازل يغرق
راسو مقطوع حيرتو حايرة
فكرو واقف بين يطرِّق
وبين يشيل جالون(زادو) يشرِّق
يمسك المنجل يطرِّق
قلبو ينبر الشاكوش يطربِق دقّو والمنجل ينقنق
حمتو دقّك دق مقلق
في حشاي يوقد يحرِّق
حمتو شرِّق
حمتو شرِّق
حمتو شرِّق
شان تفرِّق
وحمتو مشلول بين يطرِّق
وبين يشيل جالون يشرِّق
داخُل الوسواس يوسوِس
"حمتو منّو وليك تقرِّش
تاني منُّو وليك تفلِّس"
حمتو لا ولدوك مهندس
حمتو لا خلقوك مدرس
لي ثواني الحال بنعوش
وتاني حالاً زين يمغِّس
فيكَ بوم الهم معشعش
ليك سنين في الفوق تحنِّس
تأبى تتغاباك تطرطِش
وهسّه قبّال ما تفلِّس
ولي جريد البؤس تنقرِش
ولامتين للرأس تنكِّس
لامتين ياحمتو شرِّق
عدِّي فرِّق ..
ندِّي ونِّس
حمتو شرِّق
حمتو شرِّق
وحمتو مصلوب بين يطرِّق
وبين يشيل جالون يشرِّق
فكرو مشتت مسرِّح
بالو يتذكر بعيد
ساعتو لامن كان شويفع
كان بيلعب بالحديد
كان بيفرح لمّا أبوهو
يدِّي ردمة من الحديد
بينه يسرح كلُّو يرتع
لاهي مبسوطاً سعيد
ما يهمُّو قميص مرقَّع
ولاَّ برطوشاً جديد
ياما قام زير دمّو نقَّع
وجسمو نبَّق بالحديد
وبرضو يرجع كلُّو يرتع
لاهي مبسوطاً سعيد
من ضواحي اللاوجود
حمتو جا العالم طريد
ماشي بين الناس وحيد
تمرة حايمي بلا جريد
ما حصل مدّت لو إيد
شان تبارك ليهو عيد
ومين يبارك لي بعيد
كل يوم في قيد جديد
هام وقضَّى صباهو صائع
لا صويحب لا نديد
وحمتو مرَّة سأل أبوهو
لمّا شفَّع كاتلوهو
وجعوهو وحندكوهو
يابا وين طينَّا وأرضنا ؟؟
قام أبوهو إنضارى غادي
ورشَّ بي دمعو الحدادي
وحمتو صاقع وين أرضنا ؟
وين دواليبنا وأوضنا
وين أهلنا ووين بلدنا
وليش بعضنا يدوس بعضنا ؟؟؟؟
تاني أبوهو إنضارى غادي
ورشَّ بي دمُّو الحدادي
إنت مالك يابا ساكـِ ..
يي مالك الدقّاك مِنو
قام أبوهو إستغفر الله
وشالُّو ملِّين قالُّو يلاَّ
إشتريبه حلاوة يلاَّ
حمتو راح باع الحلاوة
وفي الدرب حاشوهو شفَّع
ومن قَبُل يصل الحدادي
نوحو كان سبّاق وأسرع
(ورا)خِبر أبوهو سبب بكاهو
من عقاب صوتاً مقطَّع
قام رجالة عشان يحصِّل
لاحظ الخطوات بترجع
لي طويقات غلبو قفَّل
وكفلت القلب الموجع
حائط الأيام تكسَّر
حمتو شبَّا وكلما يكبر
كلما يصغر
والهموم أكوامة تكتَّر
فوق رويحتو وكلما يودر
هم قَبُل ما حمتو ينسر
يلقى تاني التحتو بنقَّر
ثار .. وسلّم لي قسمتو
وبرضو ما سابو المقدر
جاء الخريف في ليلة هذّر
لي كرارق حمتو كسَّر
للعفيش والعدِّي شتت
والحديد الراجي صقَّر
في جنينة سيدي صنقر
تحتو كوم أطفال مقمبر
وأم بترفع في الأيادي
وفي الفراغ الصوت تكسَّر
صمتو سبَّا .. وأهَّا زفَّر
فكرو طلوح فات وبحَّر
في متاهات ماب تُقدَّر
والمطر بيناتو مطَّر
لي كرارِق ذاتو كسَّر
وحمتو حد ما يوم يعاين
للبيوت روق الجنائن
زي لويمبة وسط رتاين
حمتو بس يسكُت يعاين
بس يعاين
بس يعاين
لمّا تسألو يوم عن إسمو
حمتو لي إسمين يملِّي
حمتو ماب يعرف قراية
وحمتو ماب يخبر يصلَّي
إلاَّ بس يعرف يغنِّي
ولي شراب الروح يدلِّي
يطرا لامن ماتت أمُّو
ما اتلقوا أخواته اليحمُّو
ما لقى الإيد التريِّح
لا إتلقوا الناس اليجمو
ما اتلقى الزول اليصيِّح
لا اتلقوا الفقراء اليصلُّو
رغم إنُّو وإنُّو إنُّو ؟؟
ما مقصِّر كلُّو كلُّو
بينو عوعا وبينو صيَّح
دمعو حمَّا ودمعو ريَّح
قلبو صلَّى وقلبو سبَّح
وبينو حلَّ وبينو ينزح
ينزح
ينزح
ينزح
ومرت الأيام درايش
وحمتو محتار كيف هو عايش ؟؟
جاري في الأرزاق يحاوِش
رُبْ وقع بيناته دايش
حمتو مات بين المعايش
حمتو مات مع إنُّو عايش
وما بكت غير الحدادي
مات وماطقَّالو صايح
لا خبيرو طقش رادي
مات وما نعتو الجرائد
لا بقت لو قبير بلادي
مات وسبَّلتو الحدادي
ونعشو شيعتو الأنادي
مات وكت قوق الحمائم
نتَّفو الصقر الرمادي
والجرب صاد البهائم
قاطع الغيث البوادي
لامن النيل بينَّا صقَّر
في الحفائر مويتو صادي
وماشي صدَّا حرِد بلدنا
طاش يلوص ..
كايسلو وادي
مات وكت ماتت مثلنا
واقعي لاحيله وتنادي
ولمّا صوت الرب تكسَّر
والقيم باتت قلادي
مات مع الإنسان وسطنا
ويوم صِبِح عالمنا مادِّي
ولامن الصلاَّي تبول
في قفا الجامع عبادي
عاش وما عاش إعتيادي
مات وما مات إعتيادي
وحمتو في الآخرة ويعاين
للبيوت روق الجنائن
وحمتو حد ما يوم يعاين
للبيوت روق الجنائن
زي لويمبة (لهيبة) وسط رتاين
حمتو بس يسكُت يعاين
بس يعاين
بس يعاين
بس يعاين .


 


رد مع اقتباس
قديم 2011-07-13, 11:34 AM   #60 (permalink)
ابو مياس


الصورة الرمزية ابو قزح
ابو قزح غير موجود حالياً

بيانات اضافيه [ + ]
 رقم العضوية : 24
 تاريخ إنضمام العضو :  May 2011
 أخر زيارة : 2011-10-24 (11:51 AM)
 المشاركات : 570 [ + ]
 التقييم :  50
 الدولهـ
Sudan
 الجنس ~
Male
 MMS ~
MMS ~
 SMS ~
سمحه وسمريه
محبوبتي
ولفتاتا غزاله
لوني المفضل : Darkmagenta
إفتراضي رد: مكتبة محمد الحسن سالم حميد



أنا انيقنت من تالاك


لا آسف ولا محزون
على العمر القضيتو معاك
براي باقي الدرب بمشي
وخطاي تعدم الهدّاي
أكان السكّة حارت بيْ
وأكان كرّت سموم الصيْ
على نسم العشم جوّاي
قوافل صبري ماب تضهب
وأمان حاديها مو الدوباي
خيول قبّال دا ماترّت
ولا فرّت من الحوبات
ولا حرّت
ولا انشدت
ولا صدّت سروجه بلاي
وأعود من دربك الدردار
على شعب اليقان مسنود
وأحرس العرسة من تالاي
وريح شجن الليالي السود
صه .. صه يا الحشا المهرود
وهبِّد غلبك الوقّاد
قبل ما يرقدك هبّود
عشتو معاهو ما هو أجواد
زماني بلاهو يبقى يجود
عيشكن يا قماري عليّ
أنا القطّت تقي دنياي
وعشِّكن أبني بي إيدي
أنا البين الرياح جاي جاي
شرطاً ما تقوقن لي
قوقيي يبهلن عيني
ويوقد في دواخلي أساي
"منو العزَّ الحبيب ما لاك
وقدَّس لي عيونو السود
أكان سوِّيت غناك في عود
كان خدّر ملا ا*****
وكان فوّح عبير وورود
وما كان الزمن طاطا
لا وقع انحزم واقود"
شيشكن يا قميريات
كم من قبلي خاب مسعا
وما شقَّ الجيوب ودعا
علي جور الحبيب بآيات
ولا هتك القلوب ونعا
مزارات القريب بأبيات
ولا نوّح على الراحن
قدر ما ظنَّ في الجايات
مظان الخير وجرحو وِعا
ونظر قدّام مضمِّد سكتو الموجعه
.وكتّر خيرو يا أيام
وكتّر خيرك إنتي معا
ده ما أول صد ولا آخر ود
وكم من صد ودادي رعا
ويا زارع حياتي صدود
عذابي معاك إنّي غمامة
وإنت كركي لا محدود
ونبت البينا كان لابد
يضبلن ما يضبلن كيف
وإنت لقيتو عز الصيف
صهاديب الصعب صالا
نتقت النسمة من تالا
نتفت الغيم خريف وخريف
حبست تسابو تحت القيف
وقطع سرسار جداول الود
وصنّه يباب ودابك جُد
قبيل وين كت ؟
قبيلك كان يكفِّي رزاز
بعد دا إن جيت
أوديك وين
بعد دا إن جيت
وأنا اتيقنت بدري قبيل
بعد فرّجت فيِّ الليل
ونبّاه الدغش في العين
وأنهكت الوداد بالصد
وأشواقي الغبش بالبين
حليلك كنت زولي أنا
وملاذي الفي السمح والشين
تموت آهاتي لما تبق
متل جهر العديل والزين
خطاي فوق دربك الدردار
تشولت من متين ومتين
مورقت البيوت بالود
نورقت الحصاد كان صد
وكان لابُد حليلي تصد
نان تقعد تناجي الطيف
بلا البيدودي في النيران
وما من خلوة لامن ضيف
مي كم من شتلة فوق القيف
بتيبس وكم حراز في الساب
يخدّر يوم بحيرو يصد
أمش يعدل عليك الله
طريقك لا غلب لا آه
ولا نسمع مريكبك تاه
وسط لجة زمن جهجاه
وأنا الزي الشعوب مغلوب
زمان السخرة والملاك
أنا العبِّيت مخاليْ ريد
وقلت لك يا الحبيِّب هاك
أنا القبِّيت لويبي الإلفة
ألقِّم في جدَيْ محياك
أنا الباسمك ببيت محروس
وبي رسمك بقيت مهووس
أنا الصبّيت مطيرة شوق
رويتك دمّي همِّي ألقاك
ومن تعب القميحي الروس
ومن نخل المودة البوص
لقيت شدر الهوى النديان
مجرد عود وناقرو السوس
وما نوحّتَ قُت "يا ملاك
حرام رحماك أنا البهواك"
ولا حنّيت أزورك يوم
أنا الطول الولِف ساساق
جمعت أشلاي ولملم روحي
من بين ريح زمن فرّاق
وقت يا قلبي رغم الغلبِ
لا انكسرت قليلة الوعد
ولا اندفق وفا العشاق
ولا ضاقت رحابة الكون
ولا غمّاً نتح حرّاق
بحب الناس مشيت مسكون
أنا اليي دا وحبايبي يي ديل
وشيلتي أماني شايلة شيل
وفي إيدي عزاي عصا موساي
فيا ضل الغنا المايل دريبي عديل
أرم موزون
على ناساً غبش بالحيل
بتآكل من وشي ا*****
وتشرب من بواقي السيل
وتنطارش جراح الحال
تحت موّال معطّر فأل
يقطّر من عيون أطفال
بتلفح من هجيره ضليل
يجم جوّاها زي شبّال
يرسِّي الخاطر المغبون
يلولي بنسِّي جوع البال
خلا الماعون ..
تفتِّش في القميرة شليل
شليله المافي تربى رجال
وتمرق في الدروب آمال
تعدل الميل ..
وتركز لي رماح الويل
وراء درق العشم في بكرة
يا بكراها شان ماتكون
ويا بكرانا قدر الكون
بعد الخيل ..
وأشد الحيل ..
وأتكِّن فوق تقانت الليل
شعاعات الغنا الميمون


 


رد مع اقتباس
رد


العلامات المرجعية


الكلمات الدلالية
مكتبة, محمد, الحسن, حميد, سالم

ادبيات


يشاهد الموضوع حالياً: 1 (0 عضو و 1 ضيف)

 

أدوات الموضوع
أنماط عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code هو متاح
الإبتسامات نعم متاح
[IMG] كود متاح
كود HTML معطل
Trackbacks are متاح
Pingbacks are متاح
Refbacks are متاح



البث المباشر   روابط   وصلات مهمة   إنتقالات سريعة  
قناة الرحمة   اتصل بنا   الهلال السوداني   التسجيل  
البث المباشر مكه   شبكة حلتنا السودانية | أخبار السودان اليوم | كوره سودانية | المريخ السوداني تفعيل حسابك  
قتاة الجزيره   مشاهدة طاقم الإدارة اخبار السودان طلب كود التفعيل  
قناة العربية   اجعل جميع المنتديات مقروءة قناة السودان http://hiltna.com/wp/%D9%86%D8%AA%D9%8A%D8%AC%D8%A9-%D8%A7%D9%84%D8%B4%D9%87%D8%A7%D8%AF%D8%A9-%D8%A7%D9%84%D8%B3%D9%88%D8%AF%D8%A7%D9%86%D9%8A%D8%A9-2012 نتيجة الشهادة السودانية
قنوات سودانية   الأرشيف   قناة النيلين http://hiltna.com/wp/%D9%86%D8%AA%D8%A7%D8%A6%D8%AC-%D8%A7%D9%84%D8%B4%D9%87%D8%A7%D8%AF%D8%A9-%D8%A7%D9%84%D8%B3%D9%88%D8%AF%D8%A7%D9%86%D9%8A%D8%A9-2013نتيجة الشهادة السودانية 2013  
 



الوقت الان حسب توقيت مدينة الخرطوم 12:08 AM.





LinkBacks Enabled by vBSEO © 2011, Crawlability, Inc.